၁။စာမေးပွဲကျင်းပရခြင်းရည်ရွယ်ချက်

ဂျပန်ဖောင်ဒေးရှင်းဂျပန်ဘာသာအခြေခံစာမေးပွဲ (Japan Foundation Test for Basic Japanese၊ အတိုကောက်အခေါ်- JFT-Basic) သည် အဓိကအားဖြင့် အလုပ်လုပ်ရန် ဂျပန်နိုင်ငံသို့ လာရောက်မည့် နိုင်ငံခြားသားများ နေ့စဉ်နေထိုင်မှုဘဝအတွင်း ပြောဆိုဆက်ဆံရာတွင် လိုအပ်သော ဂျပန်ဘာသာစွမ်းရည်ကို တိုင်းတာသည့် စာမေးပွဲဖြစ်ပါသည်။

ဤစာမေးပွဲကို "ကျွမ်းကျင်လုပ်သား အမှတ် ၁" ၊ "ကျွမ်းကျင်မှုဖွံ့ဖြိုးတိုးတက်ရေးအလုပ်အကိုင်" နေထိုင်ခွင့်ဗီဇာများ ရယူရန် လိုအပ်သည့် ဂျပန်ဘာသာစွမ်းရည်အဆင့်ကို တိုင်းတာသည့်စာမေးပွဲအဖြစ်လည်း အသုံးပြုနေပါသည်။

၂။စာမေးပွဲသတ်မှတ်ချက်

ဂျပန်ဘာသာသည် မိခင်ဘာသာစကားမဟုတ်သော နိုင်ငံခြားသားများအတွက် ရည်ရွယ်၍ ဤစာမေးပွဲကို ကျင်းပခြင်းဖြစ်သည်။ အဓိကအားဖြင့် ဂျပန်နိုင်ငံသို့ သွားရောက်အလုပ်လုပ်မည့် နိုင်ငံခြားသားများအတွက် ရည်ရွယ်ပါသည်။

၃။စစ်ဆေးမည့်ပုံစံ

ဤစာမေးပွဲအား ကွန်ပျူတာစနစ်ကို အခြေခံသည့်ပုံစံ (CBT: Computer Based Testing ) ဖြင့် ကျင်းပမည်ဖြစ်သည်။ နိုင်ငံအသီးသီးရှိ စာစစ်ဌာနများတွင် ကွန်ပျူတာကို အသုံးပြု၍ မေးခွန်းများ မေးမြန်းခြင်း၊ ဖြေဆိုခြင်းများ ပြုလုပ်ပါမည်။ ကွန်ပျူတာ မျက်နှာပြင်ပေါ်တွင် ပေါ်လာသည့် မေးခွန်းနှင့် နားကြပ်မှတစ်ဆင့် ကြားရသည့်အသံများကို နားထောင်၍ ကွန်ပျူတာမျက်နှာပြင်ပေါ်မှာတစ်ဆင့် ဖြေဆိုရမည်ဖြစ်သည်။

ပုံ ၁ CBTမျက်နှာပြင်ပုံရိပ်

ကွန်ပျူတာမျက်နှာပြင်အလယ်ဗဟိုဧရိယာတွင် မေးခွန်းနှင့် ရွေးချယ်ရမည့်အဖြေများကို ဖော်ပြထားပါသည်။ ထို့ပြင် ကွန်ပျူတာမျက်နှာပြင်တစ်ဝိုက်တွင် မေးခွန်းကဏ္ဍအမည်၊ စာမေးပွဲအမည်၊ ကျန်ရှိသောအချိန်နှင့် ဖြေဆိုမှုအခြေအနေ စသည်တို့ကို ဖော်ပြထားသည်။

ပုံ ၂ မေးခွန်းမျက်နှာပြင်ပုံရိပ်

ပုံ ၃ ပုစ္ဆာ၏ ဒေသိယဘာသာစကား pop-up ပုံရိပ်

ဤစာမေးပွဲတွင် မေးခွန်းအား အင်္ဂလိပ်ဘာသာဖြင့် ဖော်ပြထားသည်။ Your Language ခလုတ်ကို နှိပ်လိုက်ပါက မိမိနိုင်ငံ၏ဘာသာစကား*ဖြင့် မေးခွန်းကို ဖတ်ရှုနိုင်မည်ဖြစ်သည်။**
မေးခွန်းအဓိပ္ပာယ်၊ အခြေအနေများကို သဘောပေါက်နားလည်အောင် သေချာစွာဖတ်၍ ဖြေဆိုပါ။ နားထောင်သဘောပေါက်ခြင်းကဏ္ဍတွင် Play ခလုတ်ကိုနှိပ်ပါက အသံထွက်ပေါ်လာမည်ဖြစ်ပြီး ၂ ကြိမ်အထိ နားထောင်နိုင်မည်ဖြစ်သည်။ ဖြေဆိုလိုသည့်အဖြေကို click နှိပ်၍ ရွေးချယ်ပါ။ ရွေးချယ်ထားသည့် အဖြေသည် အရောင်ပြောင်းသွားမည်။
*မိမိနိုင်ငံ၏ဘာသာစကားဆိုသည်မှာ အောက်ပါအတိုင်းဖြစ်ပါသည်။
Your Language 1 : အင်္ဂလိပ်ဘာသာ၊ တရုတ်ဘာသာ၊ အင်ဒိုနီးရှားဘာသာ၊ ခမာဘာသာ၊ မွန်ဂိုဘာသာ၊ မြန်မာဘာသာ၊ နီပေါဘာသာ၊ ထိုင်းဘာသာ၊ ဗီယက်နမ်ဘာသာ
Your Language 2 : ဥဇဘက်ဘာသာ ဘင်္ဂါလီဘာသာ၊ လာအိုဘာသာ၊ မလေးဘာသာ
** ကွန်ပြူတာမျက်နှာပြင်၏ အရွယ်အစားပေါ်မူတည်၍ မေးခွန်းမျက်နှာပြင်နှင့်၊ ပုစ္ဆာ၏ ဒေသိယဘာသာစကား pop-up တို့ကို ဘေးချင်းယှဉ်လျက် ပြသထားခြင်းရှိမည်။

၄။စာမေးပွဲဖွဲ့စည်းပုံ

ဤစာမေးပွဲတွင် စကားလုံးများနှင့်ဝေါဟာရများ၊ စကားပြောနှင့် ဖော်ပြချက်များ၊ နားထောင်သဘောပေါက်ခြင်း၊ ဖတ်ရှုသဘောပေါက်ခြင်းစသည့် အပိုင်း(၄)ပိုင်း ပါဝင်ပါမည်။ ဤစာမေးပွဲ ဖွဲ့စည်းပုံနှင့် မေးခွန်းအသီးသီး၏ ရည်ရွယ်ချက်မှာ ဇယား(၁)အတိုင်းဖြစ်သည်။

ဇယား(၁) စာမေးပွဲဖွဲ့စည်းပုံနှင့် ရည်ရွယ်ချက်

မေးခွန်း ၅၀ ခုခန့် မေးထားမည်ဖြစ်ပြီး ဖြေဆိုချိန်မှာ မိနစ် ၆၀ ဖြစ်ပါသည်။ မေးခွန်းကဏ္ဍအလိုက် ဖြေဆိုမှုကြာချိန်ကို ကန့်သတ်ထားခြင်းမရှိပါ။ မေးခွန်းကဏ္ဍတစ်ခုတည်းအတွင်းတွင်ဖြစ်ပါက အချိန်မရွေး ပြင်ဆင်ခြင်း၊ ထပ်မံဖြေဆိုခြင်း ပြုနိုင်ပါသည်။ သို့သော် နောက်ထပ်မေးခွန်းကဏ္ဍတစ်ခုသို့ ပြောင်းလိုက်ပြီးပါက ရှေ့တွင်ဖြေဆိုခဲ့သော မေးခွန်းကဏ္ဍသို့ပြန်သွားပြီး ဖြေဆိုခြင်းမျိုး မပြုနိုင်တော့ပါ။ ထို့အပြင် နားထောင်သဘောပေါက်ခြင်းကဏ္ဍတွင် မေးခွန်းများကို ရှေ့နောက်ပြောင်းပြီး ပြင်ဆင်ခြင်း၊ ထပ်မံဖြေဆိုခြင်းများ မပြုလုပ်နိုင်ပါ။

၅။ ဂျပန်ဘာသာစွမ်းရည်အကဲဖြတ်အဆင့်

ဂျပန်ဘာသာစွမ်းရည်အဆင့် ၃ မျိုးကို အကဲဖြတ်ပါသည်

ဤစာမေးပွဲသည် ဥရောပဘာသာစကားဆိုင်ရာ ဘုံရည်ညွှန်းချက်မူဘောင် (CEFR：Common European Framework of Reference for Languages: Learning, teaching, assessment) ၊ “JF ဂျပန်ဘာသာစကားသင်ကြားမှုစံနှုန်း” (JF-Standard) ၊ “ဂျပန်ဘာသာစကားသင်ကြားမှု ရည်ညွှန်းချက်မူဘောင်” မှ A1 ၊ A2.1 ၊ A2.2(A2) အဆင့်များနှင့်ပြည့်မီခြင်းအနေအထားကို အကဲဖြတ်မည်ဖြစ်ပါသည်။
၁၀ မှတ်မှ ၂၅၀ မှတ်အထိ အတိုင်းအတာအတွင်း ၁၄၅ မှတ်မှ ၁၇၄ မှတ်အထိသည် A1 ၊ ၁၇၅ မှတ်မှ ၁၉၉ မှတ်အထိသည် A2.1 ၊ ၂၀၀ မှတ်မှ ၂၅၀ မှတ်အထိသည် A2.2(A2) ဟု အကဲဖြတ်ပါသည်။ A2.1 သည် A1 ကို ပြည့်မီနေပြီး A2.2(A2) ပြည့်မီရေး လေ့လာသင်ယူပြီး တိုးတက်လာနေသည့်အဆင့်ကို ပြသပါသည်။

*JFT-Basic သည် ၂၀၂၆ ခုနှစ် ဇူလိုင်လအထိ A2.2(A2) သီးသန့်ကိုသာ တိုင်းတာသည့် စာမေးပွဲအဖြစ် ကျင်းပလာခဲ့သော်လည်း ၂၀၂၆ ခုနှစ် ဩဂုတ်လမှစ၍ A1 နှင့် A2.1 တို့ကိုလည်း တိုင်းတာအကဲဖြတ်နိုင်လာပြီဖြစ်ပါသည်။

ပုံ ၄ JFT-Basic ဖြင့် ဂျပန်ဘာသာစွမ်းရည်အကဲဖြတ်အဆင့်

ဤစာမေးပွဲတွင် CEFR ၊ JF-Standard ပါ A1-A2 အဆင့်၏ Can-do အပေါ်အခြေခံသည့် မေးခွန်းများကို မေးမြန်းမှာဖြစ်ပြီး “စကားလုံးများနှင့် ဝေါဟာရများ” ၊ “စကားပြောနှင့်ဖော်ပြချက်များ” ၊ “နားထောင်သဘောပေါက်ခြင်း” ၊ “ဖတ်ရှုသဘောပေါက်ခြင်း” စသည့် အပိုင်း ၄ ပိုင်းကို ခြုံငုံကာ ဂျပန်နိုင်ငံတွင် နေ့စဉ်လူမှုဘဝအတွင်း ဆက်သွယ်ပြောဆိုမှုအတွက် လိုအပ်သော ဂျပန်ဘာသာ စွမ်းရည်ကို တိုင်းတာပါသည်။ A1 နှင့် A2 အဆင့် အကြမ်းဖျင်း နမူနာကို ဇယား (၂) တွင်ကြည့်ပါ။

CEFR၏ဘုံမူဘောင်ကိုးကားချက်အဆင့် : ယေဘုယျတိုင်းတာမှုအဆင့်

၆။စာမေးပွဲရလဒ်အားအကြောင်းကြားခြင်း

စာမေးပွဲရလဒ်ကို ဖြေဆိုသူထံသို့ အောက်ပါအတိုင်း အကြောင်းကြားပါမည်။

စာမေးပွဲဖြေဆိုသည့်နေ့

စာမေးပွဲပြီးဆုံးပါက ကွန်ပျူတာမျက်နှာပြင်ပေါ်တွင် စုစုပေါင်းရမှတ်နှင့် စာမေးပွဲရလဒ်ကို ဖော်ပြပါမည်။

စာမေးပွဲပြီးနောက် ရုံးဖွင့်ရက် ၅ ရက်အတွင်း

Prometric ကုမ္ပဏီ၏ဝက်ဘ်ဆိုဒ်တွင် တရားဝင် စာမေးပွဲရလဒ် အကြောင်းကြားစာကို ထုတ်ပြန်မည်ဖြစ်သဖြင့် Log in ဝင်၍ ကြည့်ရှုပါ။ စာမေးပွဲရလဒ်အကြောင်းကြားစာကို စာရွက်အနေဖြင့် လိုအပ်ပါက ပရင့်ထုတ်ယူ၍ အသုံးပြုနိုင်ပါသည်။

စာမေးပွဲရလဒ်အကြောင်းကြားစာတွင် စုစုပေါင်းရမှတ်နှင့် ၎င်းရမှတ်ပေါ်တွင်အခြေခံဆုံးဖြတ်ထားသည့် စာမေးပွဲရလဒ် ပါရှိပါမည်။ စုစုပေါင်းရမှတ်သည် အဖြေမှန်အရေအတွက်အတိုင်း ရေတွက်ခြင်းမဟုတ်ဘဲ ပျမ်းမျှခြေညှိခြင်းဟုခေါ်သည့် စာရင်းအင်းတွက်ချက်မှုအရ တွက်ချက်ထားသည့် အတိုင်းအတာရမှတ်များဖြင့် ဖော်ပြပါမည်။ စုစုပေါင်းအမှတ်အတိုင်းအတာသည် ၁၀ မှတ် မှ ၂၅၀ မှတ်အထိ ဖြစ်ပြီး ၁၄၅ မှတ်မှ ၁၇၄ မှတ်အထိသည် A1 ၊ ၁၇၅ မှတ်မှ ၁၉၉ မှတ်အထိသည် A2.1 ၊ ၂၀၀ မှတ်မှ ၂၅၀ မှတ်အထိသည် A2.2(A2) ဟု အကဲဖြတ်ပါသည်။ ၁၄၅ မှတ် မပြည့်ပါက စာမေးပွဲရလဒ်ကို ဖော်ပြမည်မဟုတ်ဘဲ "＊" ဟု ဖော်ပြပါမည်။ ထို့ပြင် ကိုးကားအချက်အလက်အဖြစ် အပိုင်းအလိုက် အဖြေမှန်ကန်မှုနှုန်းကို ဖော်ပြပါမည်။

ပုံ ၅ စာမေးပွဲရလဒ်အကြောင်းကြားစာပုံစံ

စာမေးပွဲရလဒ်အကြောင်းကြားစာ၏ စာမျက်နှာ -၂ တွင် ဂျပန်ဘာသာစွမ်းရည်အဆင့်ဆိုင်ရာ အချက်များကို ရှင်းပြထားပါသည်။ အသေးစိတ်ကို “၅။ ဂျပန်ဘာသာစွမ်းရည်အကဲဖြတ်အဆင့်” တွင် ကြည့်ရှုပါ။

၇။စာမေးပွဲရှင်းလင်းချက် စာရွက်စာတမ်း

အထက်ဖော်ပြပါ JFT-Basic ၏ အကြောင်းအရာများကို တစ်စုတစ်စည်းတည်း သိရှိနိုင်အတွက် Slide ပုံစံဖြင့် ပြုစုထားသော စာရွက်စာတမ်းဖြစ်ပါသည်။ (ဂျပန်ဘာသာ၊ အင်္ဂလိပ်ဘာသာ) လွတ်လပ်စွာ ဒေါင်းလုတ်ရယူနိုင်ပါသည်။

စာမေးပွဲရှင်းလင်းချက် စာရွက်စာတမ်း (PDF: 2.2MB)